已經51歲嘅黃秋生認真好火，因為一句「而我不知道羅志祥是誰」嘅偉論，由今年6月開始就同小豬歌迷喺網上發生激烈罵戰，近日因為秋生接受黎芷珊嘅《最佳男主角》訪問，又將單嘢舊事重提，今次秋生仲以「屎同蒼蠅」來比喻，令到成班豬迷群起圍剿秋生微博，連小豬本人都心痛粉絲被嘲笑，終於開聲護豬迷，搞到事件越演越烈。
秋生之前喺微博發咗多條博文寸爆豬迷，之後佢又暗示要退出微博，但原來佢只係刪除博文，但秋生此舉都平息唔到豬迷嘅怒火，連日來都不斷喺秋生微博留言鬧爆。
鬧羅白粉洩憤
噚日秋生終於忍唔住又再發功，先後發咗兩條博文反擊豬迷，並黃老師上身道：「今日教D（啲）羅白粉一個中文字，吾（唔）好成日用又寫錯別字，等人話羅白粉冇文化拿（嗱）！係噁心呀，吾（唔）係惡心，有口嘅，記住啦，鬧我嗰陣要用噁心……沒空和豬羅粉玩了，你們在這罵也是白罵，我不看的，另各位博友，別和他們糾纏，小鬼難纏。」不過秋生捉人錯別字時又唔執執自己啲錯別字，之次試過將「膜拜」寫成「摸拜」，一陣俾班豬迷捉番你轉頭就認真失威啦。