的士驚魂，男女有別：女乘客驚遇「雨夜屠夫」，男司機怕載「慾海肥花」。呢個唔係都市傳說，而係發生喺94年嘅真人真事。慾海肥花又名梁秀英，係體重逾200磅嘅肥女子，為搭免費的士，居然諗到「車債肉償」呢個方案，奇在有司機照做如儀。完事後，肥花虛報俾司機強姦，浪費警力被罰二千蚊，事件亦被傳媒廣泛報道。
安德尊讚得意
慾海肥花嘅驚人行徑炒熱全城，當時無綫節目《城市追擊》派出「大王」安德尊貼身追訪，兩人朝夕相對，肥花竟對安德尊起痰，仲扯住安德尊衣服當眾示愛兼求婚。有次安德尊影迷聚會，肥花又突然變節，強吻啱啱出道、仲係白臉小生嘅古天樂，嚇到古仔冇晒反應，名副其實陰功豬咯！話說肥花之後結婚生子，重過比較正常嘅生活，亦有報道話佢攤大手板攞綜援，生活無憂㖭。
原來安德尊對當年追訪肥花留下深刻印象，佢噚日喺電話中話：「我哋都好鍾意《城追》呢個節目，探秘搵料幾得意，接觸咗肥花，佢份人其實好人一個，又幾得意。」肥花曾向安德尊示愛，佢話：「肥花同我玩吓啫。我近年都睇過有關佢報道，聽講佢啲仔女都大晒啦！」
撰文：阿Wow