【土瓜灣】
現年45歲嘅胡渭康同23歲now主播劉振宇（阿水），早排被影到買餸返屋企，傳出斷背疑雲，點知佢哋完全唔避忌，大前日佢哋仲孖住喺胡渭康土瓜灣屋企附近嘅運動場跑步。嗰日下晝1點幾，佢哋趁人少少約埋做運動，阿水買咗條腸仔邊行邊食，未跑步先醫吓肚，點知佢咬咗一啖之後就遞畀胡渭康食，果然老友。
胡渭康同阿水去到運動場竟然先吹水，似乎志不在做運動，阿水仲執咗塊樹葉同胡渭康老吹，雖然唔知有乜咁特別，但就到胡渭康笑晒口，兩人消磨咗一陣，阿水先幫胡渭康拉筋做舒展動作，似足阿四服侍周到，之後佢哋落場跑步，阿水邊跑邊回頭實好友，擺明係嚟陪跑，胡渭康雖然人到中年，但跑步依然有氣有力，冇乜喘氣。
再飲口水尾
下月3日胡渭康喺九展開騷，估計阿水陪佢跑步練氣，佢哋跑咗兩個圈就坐低休息，仲一支健康飲品兩份飲，真係友誼萬歲！
採訪、攝影：陳慧安、黃文偉
