30多歲的阿Ken，十多年前愛上釣魚，有空必相約友人出海垂釣，「次次最少有五、六斤魚穫，同親友一齊食，真係好開心」。他說見到鯊魚一刻並不害怕：「第一次釣到鯊魚，興奮多過驚！」但事後回想卻感心寒，「如果嗰刻跌落海都幾驚，擺隻手落去唔知會唔會食埋你」。
上傳fb引起迴響
釣獲青鯊後，Ken立即拍照並放上facebook分享，引起朋友不少迴響。「佢哋都話釣到鯊魚好誇張，又問有冇放番落海」。他知道鯊魚一旦上釣，多數必死無疑，索性拿去朋友的酒樓，以紅燒方式煮來吃。「好似紅燒斑球咁，不過味道冇咁好食，啲魚肉好似膠咁韌，但啲皮就好滑，有骨膠原」。他吃過後，還是希望以後不要再釣到鯊魚。載阿Ken等人出海垂釣的船家天哥說，屯門一帶海域不時有鯊魚群出沒，十多年前更多次在深井嘉頓對開海面見到黑鰭鯊。「好大條，好大支鰭露出水面，不過有十幾年冇見過，唔知係咪海水污染」。天哥說街市也有賣竹鯊，不少潮州人會買來打魚蛋，貪其「啖啖肉」，但肉質不夠鮮甜嫩滑，故並不受歡迎。《蘋果》記者