知所進退嘅前政務司司長林瑞麟去咗英國牛津大學讀神學，《主場新聞》噚日報道，外號「人肉錄音機」嘅林D9，星期二公然喺牛津大學「播帶」，主持一個學術講座大談「香港命運」。放下烏紗嘅林D9越洋大讚北京將普選納入《基本法》，仲多得特區政府向阿爺爭取普選時間表。八方認為呢次演講唔聽冇損失，皆因佢呢番言論喺香港已經講過N次。林D9自吹自擂，仲將香港家吓仲未有普選嘅責任，歸咎於港英政府太遲推直選。唔通林D9唔記得咗，當年肥彭提出取消所有立法會委任議席，大搞新九組，加快民主步伐，即時俾前港澳辦主任魯平狂抦係千古罪人咩？
隻字不提中港矛盾
但中央干預本港選舉、中港矛盾呢啲問題，D9隻字不提。《主場新聞》形容聽眾對林D9播帶顯得甚為受落，仲有人話對佢大大改觀。