養尊處優嘅謝玲玲，自從同林建岳離婚後，生活依然有寄託，平日習吓畫，選購吓首飾咁，加上近年仔女都聽聽話話，好似長子林孝賢幫緊老竇手打理家族生意，而掌上明珠林恬兒就喺里昂做銷售經理，做阿媽嘅都放心，不過近日唔知係咪見到一眾闊太個個投資有道，佢最近殺入財圈。
2100萬做大股東
據聯交所股權資料披露顯示，謝玲玲星期一（15號）喺場外用2100萬，平均價25仙，買入8400萬股寶源控股（692），持股量由4.85%增至8.69%的須披露水平，成為最大股東。15號寶源一度勁升近一成，之後發通告話，除早前有關收購外，不知悉股價及成交異動原因。
華華都驚會唔會係同名同姓唔同人，但接近消息人士透露，係大家都識個位謝玲玲喎。家寶源個揸fit人係細價股炒家李鋈麟（Alan Lee），間公司業務都幾「多元化」吓，除咗做成衣，採礦，仲有證券同放債業務。今次入股事件動機未明，所以華華第一時間打畀謝玲玲問吓，佢話家唔喺香港，又話入股嘅唔係佢，仲問華華有冇搞錯咗，咁就真係奇情喇！
李華華
mailto:[email protected]
