隔牆有耳：
阿富辣㷫　卿姐怒撇 - 李八方

民主黨當日支持政改方案係啱定錯，內部到家仲有爭議；當中最惹火嘅代主席劉慧卿，噚日應邀出席數碼電台節目時，就同因為政改而出走嘅前黨友鄭家富，為此開拖互片。

一講政改就扯火

96年一齊瞓街爭普選、反對臨立會嘅卿姐同阿富，喺節目到一講政改就扯火；卿姐堅持撐政改冇錯，又話方案就算放喺2005年，都一樣支持！呢句嘢即時辣㷫阿富，話方案如果喺05年出現，民主黨一定唔支持，淨係李柱銘都唔會同意！阿富之後越講越激動，拍晒枱話卿姐唔清楚民主黨情況，冇資格做代主席，原本黑晒面嘅卿姐大鬧阿富唔畀機會佢發言，然後拋低一句：「咁叫言論自由？早唞啦！」隨即起身攞手袋走人。
阿富做電台主持做得咁過癮，加上證婚生意有聲有色，唔怪得冇興趣做議員。睇番立法會議員天主教監察組嘅議員考勤報告，阿富上屆缺席大會達24次，只好過「懶王」霍震霆少少，睇嚟阿富已冇心戀戰。