已故全國政協霍英東，被喻為商業界奇才，係白手興家靠地產發迹嘅富一代，佢有三個老婆，家族成員夠晒繁衍。霍家呢排忙於籌辦下月嘅「剛晶」婚禮，霍英東二房馮堅妮所生嘅霍文芳（Thomas）呢，就忙於入市炒樓，最近用1.2億買咗中半山豪宅新盤君珀低層兩個單位，成兩萬七蚊一呎。
君珀得番10間
呢兩個單位，一個2478呎，另一個2007方呎，由於一梯得兩伙，即係話佢用億幾銀買起全層。土地註冊處登記資料，Thomas係透過高進顧問有限公司買入單位，間公司董事就包括Thomas霍文芳，同埋現任妻子張玉節。聽路邊消息講，長實呢個半山豪宅盤，雖然單位得50個，個個單位都過半億，但眨吓眼已剩番唔夠10間，半億一個嘅豪宅都咁搶手，都拜美國佬印銀紙所致，富貴人家都驚銀紙貶值，買樓保值，人之常情吖。