過去N年，「三點不露」嘅李國寶，已經好多次同霍震霆及黃宜弘，拍住蟬聯「立法會議員天主教監察組」報告內嘅三大懶蟲。佢哋三位今屆議會退下火線；歷年對寶哥哥有彈冇讚嘅監察組，忽然有大發現咁喎，噚日竟然「追封」已經離任嘅寶哥哥，形容佢係工商界入面較為尊重個人權利嘅議員，大數佢捍衞人權嘅往績。
唔使監察組講，八方都知道啦。寶哥哥支持修訂《公安條例》保障公眾遊行集會權利、亦喺反恐條例三讀時投反對票；就連「功能界別的弊端」議案，佢亦罕有發言承認功能組別只係過渡性質。
而佢03年唔支持《基本法》23條立法，亦喺政圈街知巷聞，唔少人話佢係商界內少有嘅民主派。監察組卻大滯後，噚日先至嚟大讚寶哥哥「有正義感」；唔通過咗去嘅嘢，永遠最令人懷念？