中大內地生張文昌早前大鬧港人係「港狗」，結果被網民起底圍攻，呢位少年版孔慶東急急致歉，希望盡早平息風波，但有人卻唔想就此放過佢。一位市民早前去信中大，話張文昌嘅言論有歧視兼侮辱之嫌，同中大校訓「博文約禮」中嘅「約禮」相違，要求中大革走佢，保住校譽。
中大發言人隨即覆信畀投訴人，話張文昌已經道歉兼反省，希望畀個機會後生仔；點知呢位市民鍥而不捨再去信，話中大仲有一位名叫「陳嘉平」嘅同學，喺facebook話要殺死日本人，中大必須嚴懲。八方追查下卻發現，中大根本冇呢個「陳嘉平」，睇怕呢位市民太多心嘞。