樓價瘋狂，連四叔李兆基都賺到唔好意思，開口話樓價貴。噚日輪到合和（054）主席胡應湘，佢突然化身正義朋友，為小市民發聲，狂炳運輸及房屋局局長張炳良，要佢快啲諗計解決樓市問題，否則香港嘅下一代，就只可以住籠屋同劏房。
醒兩招畀張局長
胡應湘噚日出席完股東大會後，對家升到癲嘅樓市有感而發，話家吓樓價真係「貴過頭」，搞到社會谷谷埋埋好多戾氣。見到家普羅大眾冇得安居樂業，就令佢諗起舊時嘅公屋政策幾咁好，幫到好多人改善居住環境，佢仲舉埋我哋奧運單車銅牌得主李慧詩為例，「佢喺牛頭角下邨長大，佢都起碼有個牛頭角下邨住吖，好過住籠屋。」胡應湘仲話新加坡「山寨」咗香港房屋政策後，做得好過香港多多聲。佢叫張局長第一步要「明白樓價高企個問題喺邊先……如果連個問題都唔知，點解決啫？」，第二步就要識得「謀定而後動」，學吓點樣集思廣益，聽多啲聲音同有計劃咁去解決樓市問題。