如果命運能選擇，撐國教人士前晚喺集會所用嘅喇叭，相信會棄暗投明，站在雞蛋一方。前晚嘅添馬艦公民廣場上，支持國教嘅一群，唔知點解有人將個大喇叭，移向反國教人士方向，向對方狂轟。可能個喇叭都有性，唔想做馮煒光之流嘅傳聲筒啦，所以當撐國教一方喺度轟吓轟吓，無耐，個喇叭突然冒出一陣白煙。就係咁，成個喇叭就燒咗嘞，都算燒得轟轟烈烈。有網民就話，喇叭寧願自焚、都唔肯助紂為虐，算係一個令人尊敬嘅喇叭。