上一期晉佳話港股可能出現調整，點知美股爆上，一連兩日港股破短期頂，鑊氣繼續升溫，晉佳點都要認衰仔，短線唔敢再估頂咯。如果港股進入中短期浪頂，就點都要兩、三日派發之後先識得跌，所以港股一日未見派發迹象，投資者就可以落鑊短炒，或買入強勢股持有，實行看風駛盡。股份方面，中短線低殘股都有唔少選擇，噚日就見到隻阜豐集團（546）準備起動，港股收市前略為回吐，阜豐表現依然硬淨，似乎有動力炒上去。阜豐主要產品係MSG，即係味精，味精當中有六成原材料來自玉米，玉米價格喺6至7月期間爆升，期貨價格曾經升差唔多七成，令到阜豐以至其他味精同業面對成本壓力。有券商估計，阜豐嘅玉米成本滯後期貨價兩個月左右，估計玉米成本會反映喺下半年業績度。事隔幾個月，市場理應完全消化成本因素，但近幾個月又唔見阜豐股價明顯下跌，低位有一定支持力。阜豐係內地第一大MSG生產商，舊年年頭，有唔少內地MSG生產商關閉。由於玉米價格大升，相信下半年有唔少生產商嗌救命隨時要執笠，競爭對手少咗，但MSG需求殷切，令到市場規模繼續膨脹，結果個餅大咗嘅同時，阜豐繼續佔更大比例，所以今年上半年收入狂升45%至55.4億元人民幣，抵銷部份MSG價格下跌嘅因素。
長線走勢轉強
阜豐下半年轉嫁成本能力如何，將成為業績關鍵。摩通8月時估計，阜豐下半年業績仲要比上半年好，全年純利6.6億元人民幣，每股盈利38分，如果將摩通預測打個八折，每股盈利33.6分，市盈率僅7倍，對於競爭力強嘅行業龍頭嚟講，值得買入持有。至於內地MSG行業又點？唔少分析睇長遠需求唔差，無他嘅，全球印銀紙推高通脹，內地糧食短缺，長遠推高食品價格，飲食業承接唔到貴價食材，自然退而求其次，餐廳唯有用多啲味精。喺大家仲係擔心緊阜豐受玉米成本夾擊之下，估值先至咁低殘，睇番個周線圖，阜豐9周RSI喺今年5月至8月出現雙底背馳，剛剛先突破RSI中軸同保歷加通道中軸，長線走勢開始轉強，現價買入，實行早買早享受，中短線目標價睇3.50元。晉佳本欄逢周一、三及五刊出