對蔣震先生的印象，除了來自他是香港著名的機械公司震雄集團（057）的創辦人，且是回歸後首獲大紫荊的工業家外，更知他當年曾以65歲的高齡完成毅行者的賽事，並積極鼓勵甚或要求其公司管理人員一律要參與毅行，我實心生佩服，呢點連蔡版主主事的精電（710）都未必做到咁到位。另外為人樂道者當然就係佢有六個女，最後嗰個先係仔，又一次印證老先生的堅毅不拔。蔣家女兒很多都是公眾人物，既有歌星的三小姐，復有香港總商會首任女主席，後因欺詐罪成身陷囹圄的四小姐。不過家陣最出位嘅，當數新任立法會議員，民建聯副主席的二小姐。
撐吳克儉大發謬論
二小姐早兩日在立會先聲奪人，喺教育界議員葉建源提出的「撤吳下台（原案簡稱）」動議後發言，指要求撤科及轟走吳局長，這是專制、無理、霸道的行為。她又強調自己不認識吳克儉，其實又有幾多人真係識得呢位局長，所以不需要為他護航。咁係咪即是，識得相熟嘅就有大條道理去護航？議員議政，監督政府運作，根本就要一視同仁，不辨親疏，現無端特此聲明，只見無私顯私。跟住仲要同局長打氣，話出邊有幾百萬市民等緊佢哋啲利民政策。怪不知要撐局長，呢啲「老屈」嘅口脗，同之前局長話冇出嚟反「國教」嘅家長其實即係支持，如出一轍。二小姐意猶未盡，仲好似上咗身咁，聲大夾兇極度亢奮話：「成件事究竟吳克儉局長做錯咗乜嘢呀？（係囉，我份屬九西選區，究竟我又做錯咗啲乜嘢？點解你會喺我區當選？）假如『我間公司』有個同事佢會諗出啲新計劃，新嘅政策，經過……，大家睇清楚，發覺唔適宜推行，咁唔推咪唔推囉！你使唔使炒咗佢呀？」首先我唔知呢位小姐係咪有好多商業營運經驗，因此要以一間公司作例，只不過據聞震雄嘅經營同佢都冇乜關係。而商業機構，包括我司，若然真係有同事負責嘅計劃，抹馬厲兵準備強勢推出，到嗰陣先至發覺賴晒嘢，又或明聞到鑊氣都仲一意孤行，最終都要徒費一番功夫先搞得掂，咁樣「炒」咗佢，又有幾出人意表呀，唔係乜嘢叫「問責」。再者如果個同事係新上場，冇乜嘢功績可言，卻已見底，更加手起刀落，免得夜長夢多。另外政府推出政策，仲要係牽涉教育層面，影響深遠，且同廣大市民息息相關，亦關係持份者利益，點可以輕率而為，做咗先算？作為一個面向人民的政府，同埋一位有承擔（寫完都抹汗）的領導人，當要為政策成敗負上最終責任。至於話：「換咗黃克儉、張克儉（計我話就梗係陳克儉），甚至你葉建源你嚟上台，就可以解決問題咩？NO！」成句都係歪理，除咗最後個「NO」字，對於呢啲顛倒是非嘅議員，同埋庸碌無能嘅官員，除了響音單字外，從來都係呢個先襯佢哋。盧先亞