因為波蘭嗰邊連日傾盤大雨，主場對英格蘭呢場世盃外圍賽H組賽事要順延一日到周三先上演，結果呢場波踢成1:1平手。唔知班英格蘭國腳係喺波蘭呆得太耐，定係據報道指足總喺周二派安眠藥畀佢哋，搞到成班波都懵吓懵吓，整體表現喺水準以下；朗尼除咗入波之外冇幾腳好波，連一向穩健嘅門將赫特亦少有咁犯錯導致失波。
僅1:1賽和波蘭
英格蘭喺31分鐘先開紀錄，復出嘅謝拉特開角球，朗尼「頭槌」破網，睇番慢鏡佢似係用膊頭撞個波入網多啲，呢個亦係英格蘭全場唯一一次命中目標嘅攻門。朗尼喺下半場本來可以梅開二度，但球會隊友韋碧克底線回傳畀佢，佢離門10碼竟然射高。到咗70分鐘波蘭扳平，入波又係靠頭槌，赫特出迎太慢，由基歷克力壓尼史葛用真正嘅頭槌頂入。呢位拖連奴守將之後幾乎做埋贏波英雄，可惜再接應角球就頂高咗。
除朗尼同赫特外，其實唔少英兵喺今場波都踢得麻麻，包括湯卡華利、卡域克同迪科爾等。英格蘭星期一已到達華沙，但因為大雨，波蘭方面又唔早啲閂埋球場天幕，搞到要白白等多20個鐘頭先開到波，成班球星仲要備戰周末嘅英超賽事，真係一下子打亂晒部署。領隊鶴臣雖然繼續保住上任後法定時間不敗嘅金漆招牌，但賽後都承認球隊表現唔配拎3分。
部份國腳以為周二要踢波，喺當日都有瞓晏覺，足總惟有派安眠藥，等佢哋喺當晚冇波踢可以瞓到；唔知係咪呢個原因，搞到佢哋到咗周三場波就渾渾沌沌。
英格蘭目前喺世盃外H組仍然排喺榜首，但就比隨後嘅黑山同波蘭都多踢一場；可能班國腳覺得呢場hea吓唔輸已經收貨，留力踢英超好過，之不過英格蘭喺H組4場波裏面，兩場勝仗都係喺魚腩級對手攞番嚟，之後如果再踢成咁嘅樣，就唔敢話出線係十拿九穩。