台灣第一名模林志玲同男友「馬桶小開」邱士楷拍拖多年，下月就38歲嘅志玲姐姐，之前放風話希望40歲前結婚，點知即刻俾網友踢爆，佢哋喺本周一（15日）靜雞雞去上海「復地．御西郊」睇樓，仲分別畀人影咗相貼上微博留言：「林志玲的老公，林志玲今天跟他一起來看房子了。」
前後腳現身
爆料網友自稱係房屋經紀，佢話林志玲嗰日急急腳走入嚟，邱士楷跟喺後面，兩人前後腳嚟睇樓，着住紅裙襯高踭鞋嘅林志玲雖然只係影後，但網友力讚：「腿辣辣長啊。」至於疑似邱士楷同樣只得背脊相，但兩張相嘅地磚、柱子一模一樣，明顯係同一地點。
消息曝光後，林志玲初時否認買樓，佢話只係去上海做房地產工作，但照片喺網上流傳後，經理人惟有改口，承認林志玲的確有去睇樓，至於係咪同邱士楷一齊？經理人話：「這你就不要問我了嘛，大家都是朋友，我也認識他啊，他跟我講有不錯的建案，所以才一起去看看。」
撰文：丁寧
