查小欣和莊思敏揸弗主持的無綫新節目《爆足一周》，推出以來劣評如潮。莊思敏前晚提到節目被彈，她直認心情差，更坦言曾努力上網搵料，但卻發現幾乎全部留言皆是狂插他們的節目，不過莊思敏拒絕劈炮繼續死撐下去。
容祖兒、莊思敏、吳千語、汪圓圓和陳志健及老婆羅苡之等，前晚到尖沙嘴出席商場活動，集團負責人李家誠亦有出席。莊思敏穿上低V及大露背裝出現最為性感，但她明顯消瘦不少，是否因她和查小欣有份主持的《爆足一周》被狂插有關？莊思敏聞言直認：「都係，心情起伏好大，節目出嚟咁負面，其實成個團隊都想做好。」
掩口維護自己友
對於被觀眾及網友狂轟節目只識炒舊聞，莊思敏謂：「我哋都難做，有料又唔講得，好似啱啱有報道話韋家雄媾人妻，其實我哋都有聽到，但佢又係公司同事，所以好難講。」莊思敏懇求觀眾給予時間他們改善，她又直認：「我同阿感（黎國輝）都有上網搵料，但點知一睇幾乎大部份留言都係插我哋。」雖然節目劣評如潮，但莊思敏表示不會中途退出，她透露節目將進行改動：「我哋會即日錄影晚上先播，咁就可以緊貼啲新聞，希望大家畀次機會。」她又笑言會趁這段時間努力搵男友，若成功即在節目公開。
至於被大會形容為fashion icon的祖兒，表示沒有想過推出個人時裝品牌，會否約同公司的謝霆鋒和古巨基一同開舖做老闆？祖兒說：「佢哋買舖當然係精明，我都試過半認真睇吓霆鋒會唔會預我一份，但佢似乎冇咁嘅諗法。」
祖兒未計劃造人
提到男友劉浩龍在網上貼出玩BB相，似乎很喜歡小朋友，祖兒謂：「咁個BB真係得意，人哋嘅BB又唔同自己，我唔知佢想唔想（指生BB），但我冇諗，遲啲先。」祖兒笑言自己若結婚是奇蹟，故此一定公開。
同場的吳千語之前被拍到跟猛男同車，吳千語聲稱只是朋友，又指兩人認識太耐沒有發展可能，是否指剛剛合作而傳緋聞的林峯有較大發展機會？她笑言：「唔關事，大家啱啱先識更加冇諗呢啲。」
採訪：溫敏芝 攝影：林德雄