來自老牌家族上市公司的正經富X代表示，其所接觸的武林正宗基金經理們，竟不約而同表示，未有參與是次港股反彈。根據傳統智慧，該批能夠與Old Rich接觸的基金經理，當非泛泛之輩，他們亦冇理由較我等凡人愚蠢。
國壽盈警前通街知
將公佈業績的國壽（2628）提前數日發盈警，但其實在此之前已街知巷聞，全城偷步沽貨，當然這並不包括唔多貼巿的無知小散戶。既然連如此股價敏感內幕消息亦可通天，擺明要趁證監換屆剃其眼眉，交易所披露機制還留來幹甚麼？香港自視國際金融中心，但此事如此明目張膽，監管機構假如仍隻眼開隻眼閉，將會令許多有意來港的具實力長線投資者寒心。縱使未卻步，也只會堅持採取Hit and Run入巿態度，炒完政策炒數據再把相關有利板塊輪流炒作，攞點着數就算，實行講金唔講心。早出齊盈警就叫有情有義？未必！睇德永佳（321）之前，不如先睇黃馬褂當道、二代又接唔住、連環炒燶不止一次、連番盈轉虧、終於賣殼救亡的純上游紡織股福田實業（420）；還有做下游、對手未冧、盈利先倒退近九成的堡獅龍（592）。今時今日，炒老牌工業股，唔係炒老化工業股，申洲國際（2313）及互太紡織（1382），老闆皆出身自福田，只見新人笑，一代新人勝舊人，百般滋味在心頭。可是德永佳如果要步老化老牌後麈，斷估亦冇理由早到要在中期業績截數前大半個月，而唔係之後發盈警，好有理由懷疑同樣係炒燶咗嘢。雖然有兩家大行已Suspend Coverage，難得另外有兩家大行忽然唱好，股價又應肚即飛，意欲何為？捉錯用神？更難得係一眾小散盲舂舂，收錯風，回頭是岸！善哉善哉！胡孟青獨立股評人