澳洲女星娜奧美屈絲（Naomi Watts）唔使開工扮戴妃嗰陣，最鍾意同囝囝玩，好似前幾日佢就同男友里夫舒韋伯（Liev Schreiber）帶埋一對化骨龍去紐約公園踢波。佢哋係咁追住個波，娜奧美仲學漫畫《足球小將》入面嘅林源三守龍門，點知救波動作勁騎呢，十足猩猩跳舞，好想話佢知，波並唔係咁踢囉！里夫都唔好得幾多，動作似拗柴，最後娜奧美惟有叠埋心水教細仔Samuel玩呼拉圈算。