工業股繼續發熱，萬威（167）再升7.4%，主打液晶體顯示器嘅信利（732）以大陽燭突破橫行區，噚日推介嘅震雄（057）漲逾2%，PB折讓仍大，升勢有望持續。
有傳興勝創建（896）大角嘴工廈The Bedford全幢，以3.5億銀獲洽購。興勝現時市值僅5.9億銀，交易額已佔市值六成，完成後公司價值有望釋放，隨時展開大升浪。除上述工廈外，興勝手頭仲有唔少正貨，其中位於九龍塘嘅Eight College，每個單位叫價億億聲，倘悉數出售，有望變回淨現金公司；另外位於佐敦嘅The Austine已完成拆卸，將興建連零售商舖嘅精品住宅，勢食盡樓市升浪。建築業務方面，大股東香港興業（480）係愉景灣大地主，手持待開工項目數以十萬呎計，興勝不愁定單。
興勝現價PB僅0.56倍，平得可憐，噚日成交大增，不排除聰明錢已睇中其亮麗前景，以PB 0.7倍作目標，可見1.50元，潛在升幅25%。
唐牛