韓國肥大叔，憑一首《江南Style》成為當紅炸子雞；連帶擺明向Psy致敬嘅錢國偉版《Hong Kong Style》，段片上YouTube唔夠一星期，點擊已破50萬，錢國偉亦因為咁，成功紅咗。借其他人知名度抽水，引人注意，慳水慳力。好似濟南萬達凱悅酒店，翻拍一條《濟南 Style》宣傳片。全由員工演出，個個投入一啲都唔係Hea拍。堂堂四五星級酒店，竟然會畀員工着製服、拎衣架，於鏡頭面前忘我大跳騎馬舞？宣傳度十足。假如半島酒店拍一條《半島Style》，菲菲真係覺得間酒店降格。如果心水清，就知用呢首歌去吸強國客，未免太諷刺。最新有報告就話，內地名牌比法國賣貴72%，主要原因竟然係LV等大牌子，發現內地人唔貴唔買。大家都知內地暴發戶鍾意晒命，但家經濟增速放緩，晒命能力即時大減，更累到LV、Burberry都呻前景危，確令唔少凡夫俗子心涼。正正講中《江南Style》歌詞用意：你班有錢人，說穿了，都係充大頭。Fifi本欄逢周二、四刊出