近日市況轉旺，大家都諗緊喺11月中美政局交替之前，股市可能會出現突破，有機會執到一轉。之前平通街無人要的殘股，唔少都翻身，經紀說街外真係錢多，雖然大家仲係睇淡中國經濟，但只要中資股夠平，他們仍願意坐吓搏反彈。尤其係平靜咗一段日子的人民幣，兌美元滙價已經連續幾日創滙改新高，升值的講法又返咗嚟，但實際又係唔係咁好景？據財資界人士所講，最近人民幣、港滙都走強，但睇唔到係同資金流入市場有關。人民幣創新高，主要係QE3之後美元兌大部份貨幣都偏弱，咁以一籃子貨幣計價的人民幣，開高都好正常，加上年初唔少人做咗人仔貶值盤，家都趕住斬倉，推高滙價。美國財政部決定在11月上旬公佈人民幣是否操控滙率的年度報告，大家估會喺總統大選之後出爐，如果中國唔想又被美國借題發揮，攞佢嚟開拖，相信人仔短期仍會保持強勢。但投資者如果家就覺得要轉View睇好中國，仍然係太早。出口數字仲係疲弱，經濟仲未有強勁復蘇動力，信貸轉差的憂慮未解決，實在無辦法支持人仔長線升值。海迪