當挺唐大將林健鋒，噚日喜孜孜獲狼英委任為新行政會議成員之時，有啲唐營悍將，就繼續唔賣賬。好似唐唐家臣林大輝以及自由黨田少咁吖，眼見狼英噚日到立法會，足足用咗45分鐘重提競選時嘅「三幅被」，一啲新意都冇，難怪前者話嘥時間、後者話提筆抄筆記都冇意欲啦。
林大輝轟「嘥時間」
好多人估計，狼英將原本應該喺月中發表嘅施政報告押後到出年1月先發表，好明顯係因為袋裏面冇彈藥，冇嘢公佈。點知佢係都要整場咁嘅爛騷出嚟，好似唔知立會議員啲時間其實好寶貴。
聽完45分鐘，大輝同田少變身雙響炮。向來批狼不留力嘅大輝繼續敢言，指狼英講過去嘅嘢仲多過展望未來，而且連大輝最關注嘅工業政策提都唔提，怪唔得被狂片「嘥時間」。田少都話對狼英好失望，最初都諗住邊聽邊抄筆記㗎，可惜抄咗兩句就放棄咯，點解？八方估計，佢唔想連啲墨水都嘥埋。