可謂格鬥漫畫中經典的《龍珠》，廿尾三頭嘅男士，更應該無人未試過雙手放右腰大叫：「龜波氣功！」一隻《龍珠Kinect》以第一身視點玩格鬥，配合Kinect用體感使出拳腳功夫，最爽係跟足漫畫姿勢出超必，非常過癮，有好強嘅氣呀！ 記者：韓繼聰 攝影：陳盛臣 模特兒：Cherry@Pure Model
體感出招 動作多多
以體感來玩嘅《龍珠》 Game並唔算係第一次，Wii其實早就玩過，但始終要揸住手掣，點都差啲。今次《龍珠Kinect》全靠雙手雙腳同敵人隻抽，感覺完全唔同，簡直係悟空上身一樣。叫模特兒Cherry試玩，廿歲多啲嘅佢竟然即時架起招牌動作大叫：「龜波氣功！」成功出波更係超級興奮，《龍珠》果然深入民心。
除了必出嘅龜波，遊戲內嘅動作相當多，而隨着故事發展，需要做嘅動作亦越來越多，反應慢啲隨時中招。每個角色一般會有兩招超必，須要先使出經典嘅蹲低紮馬姿勢來「儲氣」，其他招式動作如無閑的元氣斬、比達的氣功炮、魔童的魔貫光殺炮等等，一樣跟到足，Fans一定玩得超投入。再加埋閃避、格招、防禦、連環出波出拳等基本動作，分分鐘玩到出晒汗，當減肥都仲得。
忠於原著 逾50角色登場
Fans玩得呢啲原著Game，當然期待故事忠於原著，《龍珠Kinect》就做得唔錯。故事模式由打悟空阿哥拿迪斯開始，一直打到布歐，涵蓋大部份《龍珠》故事。而每關玩家扮演嘅角色都唔同，好似第二關就要用無閑打培植人，幾乎打勻漫畫中所有戰鬥！加上間場動畫與原著極似，連戰鬥中途嘅對白都跟到足，好似重溫呢套經典漫畫一次。可惜遊戲以英文配音，感覺始終差啲，投入感打咗折扣。不過，豐富遊戲內容已經夠補數，Game中收錄超過50個角色及逾100招絕招，更有「Score Attack」模式，俾你用盡各角色隨時隻抽，Fans絕對收貨有餘！
招式示範
《龍珠Kinect》
$299
Xbox360（需配合Kinect）
