中國人最信邪，但家陣凶宅都賣過萬蚊呎，樓市真的瘋了，究竟有乜人會買凶宅呢？有個講法話，醫生、護士、消防員因為經常面對死亡，所以對於鬼神之說睇得比較化，唔怕買或住凶宅。
殺定執幾十萬
聽講有位喺鴨脷洲開業嘅醫生好多年前就係貪平，以低於市價一半價錢買入海怡半島一個凶宅作投資，其後有準買家落定後先知呢個係凶宅，立即撻定。如是者，呢位醫生合共遇到三位撻定準買家，淨係殺定都執幾十萬。醫生最後將個單位租畀一位護士，近年趁樓市高峯期沽咗個單位，大賺一筆。照咁睇，凶宅似乎真係有投資市場。不過家資訊流通咁快，網上搵凶宅資料話咁易，買家扑槌前上網查吓就冇咁易撞板啦。地產代理亦好關心凶宅市場，聽麥玲玲師傅講，噚日佢同一班地產代理食晏，有代理就問佢凶宅應該點樣定義，話如果有人喺屋企跳樓，跌落平台先身亡，唔係喺間屋入面出事，咁個單位都唔算係凶宅啫，玲玲師傅聽完都沒好氣回應！