花招變觸礁！耀才（1428）上周一先推出嘅股票分期供款計劃，聽聞突然被證監會叫停，原因係部份條款唔夠清楚。打開老虎冇有怕嘅證監會，今次真係連CY金主，即係耀才老闆葉茂林都冇面畀。耀才行政總裁陳啟峰噚日承認，股票分期供款計劃已經停咗，主要係條款上有嘢要寫清楚先，「要搞清啲注意事項啫，玩遊戲都要寫明遊戲規則啦。」
唔知幾時重推計劃
耀才公關補充，已經參加咗計劃嘅客仔要再傾，有急切需要買股嘅客可以改借孖展咁話，至於呢個計劃幾時重推，暫時無可奉告了，咁即係要冬眠啦，而證監就例牌no comment。本來個計劃嘅玩法係，耀才客仔開個孖展戶口，買股（藍籌為主共60隻股）時可畀三成首期，耀才借其餘七成，客仔喺一年內每月分期還款，息率平過一般孖展息。雖然耀才講話唔會斬倉，但客仔斷供超過一期，耀才可能放咗隻股票，咁樣又好似同斬倉冇乜分別。
冇列明斬倉條件
證券界口痕友估計，問題正正出喺呢度，「雖則佢話唔會斬倉，但現實呢個機會唔會係零，佢係有責任嚴格咁列出所有斬倉條件。」呢單嘢唔係證監會叫停真係冇人信囉。如果傳聞屬實，即係話證監會連CY金主葉茂林都冇面畀。之不過咁，證監會候任主席唐家成都有份提名CY，同樣係忠實「梁粉」，到底誰怕誰？李華華mailto:[email protected]