周潤發與黃曉明昨日出席電影《大上海》記招，發哥再發揮搞笑本色，拿曉明及其緋聞女友Angelababy來開玩笑，戲言自己喜歡俊男，且跟曉明也有一手，並要為曉明改一個英文名叫Handsomebaby，但又叫他chok少啲。發哥玩完曉明又捧他上天，讚他在電影中演得特別好，今年攞硬影帝。
周潤發、黃曉明、吳鎮宇和洪金寶，昨聯同監製劉偉強、導演王晶等在九龍灣出席電影《大上海》記招，電影公司安排一場拜師禮，曉明單腳跪地向發哥遞上拜師帖，發哥將一支龍頭棍交予曉明後即搞笑以廣東話夾雜普通話說：「拎咗呢個你係老大，請坐，我是你的小弟，師傅！再講警察就嚟，這個東西（龍頭棍）好黑，放埋一邊。」
「裝點儍更好」
曉明滿心歡喜說拜發哥為師後有人照顧，但發哥卻回應說：「咁大個明星點照顧？照顧Angelababy啦！我哋都有一手，我都鍾意俊男，嗰個叫Angelababy，你係Handsomebaby。」發哥也讚曉明在《大上海》中表現出色：「曉明演得好好，今年最佳男主角應該佢拎，不過曉明太帥，唔好咁chok，裝點儍更好。」
對於被形容在拍戲現場未埋位就玩到癲，一埋位就好壓場，發哥笑說：「我幾日唔冲凉唔洗底褲咪好『壓』囉！我哋一班人好熟，去到現場好輕鬆，係得劉偉強殺死人，好似有90幾張刀要斬死人。我拍《龍虎風雲》佢做攝影師，家變咗大導演，條底褲唔洗都係為咗『壓』死佢。」
讚鎮宇多招數
之後發哥又稱讚吳鎮宇：「鎮宇係好演員，同佢合作好興奮，唔知今日去到現場佢會出乜招，所以唔可以掉以輕心。」
談到被發哥取笑，曉明裝儍說：「我聽不懂廣東話，只聽到他說baby。發哥的人很好，大家都喜歡他，他是我遇過最貼心的大明星。」
採訪：魯萍
攝影：陳慧安
