台星趙又廷同內地女星高圓圓嘅姊弟戀打得火熱，之前仲傳佢哋閃婚，點知大前日趙又廷趁女友唔喺身邊，竟然約咗兩個女仔去台北微風國賓影城睇戲，據知其中一個女仔係趙又廷嘅前助手，同行仲有一個男友人。當晚戴cap帽遮樣嘅趙又廷，入場前仲買定爆谷同汽水。
對於被影到撇低圓圓媾女，趙又廷同經理人解釋：「我去微風就知道一定會被拍啦。」經理人話趙又廷呢排喺橫店拍電影《狄仁傑前傳》，向來念舊嘅佢返台灣就約老朋友睇戲，佢仲同公司要求放兩個月大假，問係咪趁機結婚？經理人代否認：「真的不會啦。」
圓圓唔肯嫁
高圓圓噚日嚟咗香港出席手袋活動，之後會順便為電影《盲探》補戲。對於同趙又廷傳婚訊，圓圓話：「未有準備，碰到理想的人會向理想方向發展。」問男友係咪理想對象？有冇求婚？圓圓掃額扮滴汗話：「不能這樣問，無論怎也好，不會答。我的結婚觀念來自父母，父母婚姻美滿，碰到對的人才有好開始。」
採訪：顏英儀 攝影：陳順禎
