旅發局除夕倒數，據講會喺今年移師灣仔會展舉行，過往喺IFC高空放煙火嘅情景，已經成為過去式。按照慣例，特首通常都會喺除夕夜，去倒數現場主持儀式。咦，會展係由新創建集團嘅全資附屬機構營運㗎喎，換言之狼英同純官呢對「難兄難弟」，當晚咪可以拍膊頭，送別難忘嘅2012年？
IFC倒數移師會展
IFC倒數最煞食係大廈夠高，好多地方都睇到壯觀嘅煙火效果；但會展得嗰幾層，點夠揮？八方聽聞旅發局都諗到頭痕，家構思緊「向橫發展」，即係個倒數會配合煙花同燈光，仲可能利用埋個海，營造水幕效果，再加埋背後五光十色嘅大廈，相信去倒數嘅市民，一定影到靚相。旅發局今日公佈倒數詳情，據聞製作費多過舊年嘅850萬㖭。
07年開始嘅IFC倒數，舊年先拒絕再贊助，有消息話新地郭老太覺得IFC喺08年除夕倒數後，郭家就出現兄弟不和，覺得唔吉利而唔再支持。八方覺得呢啲八卦嘢，聽完就算數，但估計純官呢個除夕，一定過得好開心；話晒今年特首選舉後，挺唐純官即時跳船去撐狼英，惹嚟唔少閒言，但佢咁義無反顧，卻成功打動到向來好少知心友嘅狼英。
佢哋嘅友誼，到底有冇萬里長城咁長？八方真係唔知，但斷估狼英一日在任，純官一日都會同佢拍住上。
mailto:[email protected]