立法會開波，建制派全線出擊，囊括所有法定委員會主席及重要政策委員會主席，泛民班人仍未醒，以為同建制派仲可以分餅仔，撈番幾個閒職主席及副主席。泛民面對建制派來勢洶洶，理應全線同建制派開拖，正副主席全部唔爭唔做，但就紮行馬入去政制、保安、法律、房屋、交通，環境及教育。但凡主席出蠱惑，就舉手動議不信任主席，將政治鬥爭遍地開花。家又冇膽全面開火，剩係得把口嘈，有鬼用。
建制爭主席位 變執政黨內閣
今次建制又控制立法會，因為知道今屆好關鍵，決定了2016立法會及2017普選行政長官模式。加上振英弱勢，民建聯見機不可失，全線進佔委員會主席，加上大會主席曾鈺成，已儼如執政黨內閣。做主席表面係主持會議，但有好多隱藏權力不為傳媒所注意。首先係定開會日期，昨日鼠王芬擒擒青改開會日期，就已露出鼠尾，比泛民捉個正着。好多時有大嘢發生，議員一定要求召開特別會議，政府多數都反對，因為怕準備不足，文件唔齊，未夾定口供等，所以委員會主席決定好關鍵。如果主席企喺政府嗰一邊，用各種理由拖延召開特別會議，便等同放政府一馬。第二個權力係主持會議方式，容許議員就某項議程發言時間，是否可繼續追問。泛民議員多採用庭上盤問技巧，要連續問先可以盤散班官，主席當日訂下之提問規則，好影響議員監察政府能力之發揮。平時冇事冇幹，主席當然就冇政治功能，但一到爆出政策爭議，施政失誤問責，事務委員會會率先成為向政府開火的首要戰場，由建制派出任，等如政府多了一條防線。最重要是今次建制派可以不顧主流民意及傳媒，唔怕樣衰也要硬來霸位，自我閹割，可以想像日後有更多靠人多舉手舉贏而不講道理的場面出現，泛民尊貴議員，你們準備好點樣迎戰嗎？添馬男