衝上雲霄，自己親手駕駛飛機未必人人都有機會，不過試玩這隻Silverlit Sky Eye遙控直升機，透過機身內置的主觀鏡頭，飛行時可以有即時實景畫面，可滿足玩家飛天的慾望。上完天，仲可以落地玩埋時速高達15公里的電動風火輪spnKiX，感受何謂極速。 記者：許福合 攝影：伍慶泉 模特兒：Shanna@PureModels 查詢：JC Shop（3148 9455）
Sky Eye主觀鏡頭易操控
玩遙控直升機，除控制它滿天飛及玩吓花式之外，有時會想：「如果能換個角度，坐上去睇吓風景夠晒盞！」這款Silverlit Sky Eye遙控直升機，據講係全球首創，機頭內置鏡頭，飛行時可將外面風景拍攝下來，且鏡頭設置於機頭，角度有如玩家親身飛行。起飛前，鏡頭亦可預先調校角度，可在機頭前方至下方作90o轉換，景色任揀！
至於拍攝到的靚景，仲可以即時無線傳送到遙控器上的1.8吋LCD彩色顯示屏上，一邊駕駛，一邊睇住「主觀鏡」，玩起來更似模似樣。Sky Eye操控範圍達10至15米，室內玩起來都算穩定，我覺得多了「第一身畫面」，要轉左或轉右，比操控普通遙控直升機容易。最過癮係鏡頭仲可以影相同拍片，可以飛到平時難以到達的位置探秘，相片質素達640×480，而影片就有VGA，會以microSD卡儲存。
玩後評
機身做工精緻，但機身過輕，比較適合在室內飛行。缺點是電池使用時間短，要經常充電。
Glove Force Flyers魔術表演
初次見人玩這個Glove Force Flyers，以為係表演魔術，毋須遙控器，抬高抬低手掌，直升機就會跟着上下升降，手掌打側仲會左右轉！這個戲法秘密在於戴上內置速度感應器的遙控手套，揮揮手就可以控制升降及平衡，遙控範圍達30呎。手套上還有按鍵，可控制螺旋槳的轉速。充電亦簡單，可經USB叉電，就能玩到10分鐘。
玩後評
螺旋槳轉速調高會飛得較穩定，缺點同樣是電量較少，不能玩太長時間。
spnKiX 電動風火輪
玩遙控直升機時，如果可以一邊飛，一邊移動，可能更加好玩。這款電動風火輪spnKiX，其實係一對電動鞋，外形有點似風火輪，穿上後再手持遙控器，就可以最高時速15公里移動。使用時要連鞋一起穿，企穩後就可慢慢加速，切記勿貪快。玩一會後再左右腳掉轉穿，移動感覺會更穩定，轉彎時只需輕傾斜身體即可。
玩後評
注意平衡，速度不要一下子提到最高。