中資股升唔夠幾日就出現回吐，其中建行（939）陰陽燭穿頭破腳夠晒肉酸，眼見中資股升唔到幾多棍就回，遠遜本地概念股頭也不回嘅氣勢，後市都係等買本地概念股更着數。不過，呢一刻本地概念股整固未完成，中資股又似轉弱，似乎兩邊短線都冇乜睇頭，個市欠爆上動力，有可能出現9月初至今最大規模嘅回吐，調整超過500點甚至1000點都唔出奇，嚟緊候低吸好過高追。大家過往視長江實業（001）、新鴻基地產（016）、新世界發展（017）、信和置業（083）為本地地產股，至於鷹君（041）、希慎興業（014）就係收租股，但係未來一年時間，晉佳覺得唔需要再分類嘞，因為大家都係炒資金氾濫、資產價格上升嘅故事，無論收租股定係地產股，都會無分彼此咁升，只爭在上升嘅先後次序，同升幅多少。參考上一浸升浪，由於資產股嘅上升次序有別，所以低撈早發力嘅股份，似乎可以早買早享受，其中合和實業（054）係唔錯嘅候低撈對象，最可愛嘅地方，係佢升起上嚟冇乜震倉，調整完買入持有，中線升勢應該暢通無阻。合和截至今年6月底止，投資物業價值174.29億元，發展中物業加埋持有作銷售嘅物業約31.63億元，兩樣加埋佔總資產五成，仲揸住79.76億嘅現金，至於共同控制個體就係公路同發電廠等穩陣資產，呢個業務組合應冇大變數。
中長線上望40元
面對環球金融世界一年亂過一年，資金氾濫之下，最好就係買啲廉價穩陣資產傍身，合和就啱晒Fund佬胃口，難怪6月到家，股價升足五成，好多年都未試過咁威。合和升咗咁多，短線追嚟無謂，尤其隻唔關資產概念事嘅合和公路（737）都爆上，睇嚟短線都差唔多，無謂焗追，等佢回吐至27元再考慮買入。論估值，合和市賬率0.8倍，剛過去年度賺36.31億元，扣除投資物業重估後大約賺16.5億元，每股盈利1.87元，市盈率15.7倍。不過，今時今日既然當佢係資產股炒，就以市賬率同佢計數，以1.1倍定目標價，中長線可以上望40元，即係睇07年高位。晉佳本欄逢周一、三及五刊出