CY轉眼就要上立法會講管治理念，且會回顧過往三個月在他自己領導下的新政府政績。單看題目，真係好難有所期待，因為究竟市民仲可以期待佢講啲咩？相信唔少香港人同我一樣，過去一段日子在各大媒體上睇到或聽到的，都只是佢同麾下官員不斷澄清、不斷回應、不斷玩口技，同埋不斷卸膊，鮮有見佢哋有乜嘢實質之作。
背棄民心 難辭其咎
所謂的利民措施，說穿了，亦不過是前朝所留下的，又或是嗰啲小恩小惠嘅乜嘢「人人暢通行」無障礙設施計劃。由他們親自制訂及付諸實行的，少之又少。有人會說，點都係梁生叫停「雙非孕婦」、擱置「一簽多行」及打擊上水區的水貨活動，大大紓緩了本港在醫療及交通方面的壓力，但可惜的是這些德政有啲根本就未交帶清楚；有啲就係據人之功；仲有啲不過係因為政府抵不住公眾壓力而就範，總而言之，就係非由他們應具的前瞻決策或不過是常識判斷能力而來的。從國民教育落荒撤回，就更能引證了新政府不但剛愎自用，且還錯估形勢，以致爛局一發不可收拾。梁粉歸咎於新政府承接的是一盤處於劣勢的殘局，新政剛上場就面對深層次的民生經濟困局，樓價嚴重高企的房屋問題、即時要上馬（咁仲話唔係政治所需？）的國民教育、緊絀的醫療資源、日趨嚴重的貧富懸殊等等。係人都知呢啲不是一時三刻能解決的棘手嘢，但試問有邊一任政府唔係面對這些挑戰。醫療、房屋及教育一直是本港長遠發展課題，過往沒有一屆政府能夠避之則吉，最起碼都要減低它們對社會所構成的負面影響。CY上場之前決冇理由搞唔清楚大局。就算係一個小小嘅經理仔加入我公司，點都會周圍打聽一下呢間公司的內部形勢，好作準備，況且佢根本一路都係建制中人，因此這又怎能成為施政失陷的藉口。坊間多個民意調查顯示，CY支持度一直下跌，雖然我對這些所謂調查不以為然，因為唔使做結果都可想而知。有人話，社會對新政府的批評已陷於不理性，凡事都批評，但點會唔係反映咗民心歸向。CY政績乏善足陳不在話下，還有其對局長們的護短，更令其失盡之前的僅有民心。佢一直話自己好聽取民意，但過去三個月以來，市民最不齒的，除了他的偽言及詭辯外，就正正係背棄民心的所作所為。而試鐘不成，又冇得彈鐘先係港人嘅哀歌。盧先亞