廟街一向是遊客聖地，有大閘蟹店覷準商機，提供即場蒸食大閘蟹及賣酒服務，成功把臨時地舖變身食堂，在橫街窄巷開檔擺食，吸引中台日遊客慕名光顧。位於熙龍里的勝記大閘蟹，店外掛上一幅鮮明紅底黃字的蟹字旗幟，店內放了凍櫃售賣大閘蟹，還有蒸爐和佐蟹的酒。店旁的橫巷，擺了三張桌椅，供客人坐下嘆蟹。傍晚時分，已有十多名遊客在橫巷開餐，吮蟹膏暢飲。記者親身光顧，獲職員熱情推銷特價110元三隻的太湖蟹，以及一壼60元女兒紅紹興酒，並即場開酒食蟹，店主黃先生說：「酒樓唔抵食，又加工費又呢樣嗰樣！」黃老太也在旁力銷：「呢度好多人食㗎，日本仔鬼佬都嚟食，食親都要最貴135蚊一隻，早前有台灣佬話家鄉食得貴，要成400蚊一隻，特登過嚟食咗千幾蚊！」
店主承認無食物牌及酒牌
黃先生在旺角經營大閘蟹舖已有五年，每逢十月便會在區內物色地舖短租兩個月，但承認自己無申請食物牌及酒牌。「大閘蟹舖好少搞（牌）㗎！」但他不同意在橫巷開枱阻街：「呢度點同，阻唔到人，阻到邊個行啫！」