中信泰富（267）前主席榮智健自從公司喺08年爆出炒燶外滙accumulator，翌年辭埋職之後，轉趨低調，甚少現身公開場合，包括馬場，前年「來福」退役後，佢亦冇再養馬，但原來佢隻新馬「奔月」已經抵港個幾月，差不多日日晨操，未知幾時再見到榮智健拉頭馬嘅風采呢？
榮智健1994年已經做馬會董事，養過唔少好馬，堪稱大賽馬主，其中兩隻「活力先生」同「奔騰」係九十年代馬王。中信泰富炒燶外滙accumulator後，榮智健越來越少公開露面，「來福」退役後，佢再冇以個人名義養馬，呢兩年就更加少去馬場。
「奔月」日日晨操
去年中佢已經抽籤抽中可以養馬，但冇乜動靜，最近先發現佢有新馬落地，新馬來自英國，只得兩歲，屬於全新馬，未正式比過賽，唔知表現如何。
佢對仔女榮明棣同榮明方，亦有同金管局前總裁任志剛、終審法院前首席法官李國能等朋友夾份養咗隻「飛燕」，可能榮智健見佢哋傾得高興，心癢癢都要養番隻來玩。榮智健之前養過14隻馬，不時拉頭馬，可見佢揀馬相當有經驗，大家不防拭目以待。
李華華
mailto:[email protected]