嘩！嘩！嘩！香港又要釋法咩？點解市民噚日喺網上同聲哀悼香港法治已死？哦，原來係梁美芬獲選為立法會司法及法律事務委員會主席，唔少市民即時諗起以捉老鼠成名嘅佢，過往騎呢事迹一大堆，眾望鼠歸上到位，難怪市民喊驚，擔心立法會「鼠患無窮」。網民對鼠王芬坐正司法Panel後瘋狂洗版，就知民情幾咁洶湧。有網民話鼠王芬曾經提出懲罰選民論，佢今次喺司法Panel話事，先係對港人嘅最大懲罰；亦有網民質疑，點解佢過往提出好多有關司法嘅謬論，都可以做到主席咁諷刺㗎呢？睇番佢過往嘅「金句」，就發現全城激憤唔係冇原因。例如剝削市民參選權嘅替補機制惡法，佢就係始作俑者；維權人士劉曉波被判刑之時，佢竟然話「是外國聲援所致」 ，完全唔提中國審訊過程幾咁黑暗。
死撐自己不群不黨
查實呢，佢唔單止喺法治問題上常有「獨到見解」，其他言行亦非常出眾。例如話，大禹係治水嘅、佢老竇就係大舜囉；明明有西環共產黨撐，又話自己不群不黨喎。可惜政治世界裏面，有票就是爺，而且鼠王芬仲有阿爺撐，市民打極佢都唔殘。有網民好悲觀咁話，鼠王芬坐正，意味香港好快會實施大陸法、取代普通法。泰美斯女神像，唔驚就假咯。mailto:[email protected]