【尖沙嘴、銅鑼灣】
現年46歲嘅鄧萃雯早前好風騷出席活動時暗示自己有新戀情，仲半開玩笑挑戰狗仔隊話如果影到嘅唔係「戲神」或者「才神」，嗰個就唔係真命天子唔使登喎。前晚8點幾，雯女同一名女性朋友離開佢位於長沙灣、有四小龍之稱嘅碧海藍天寓所。
雯女開住佢架豐田車仔直駛去尖沙嘴三軍會會所泊低架車之後，戴住帽嘅雯女同朋友就落車去到會所其中一個禮堂。禮堂外寫住「何志滌牧師登陸之喜」，喺慶祝何牧師嘅生日宴。
受歡迎狂合照
好多教友見到雯女入嚟都好熱情同佢打招呼，好多喺另一邊傾緊偈嘅嘉賓，都專登走過來搵雯女，唔少仲要求合照㖭！就算雯女入席坐低，都仲有人過枱搵佢影相，佢都有求必應而且全程保持笑容，不過就唔見雯女嘅戲神才子出現。餐酒席飲到夜晚11點左右就散，雯女同位女士一齊返咗長沙灣寓所。
此外，噚日雯女一個人揸車去銅鑼灣睇皮膚護理，期間佢去洗手間時笑住話：「調理下啫，我每個月都嚟，我上次見記者冇講過蜜運喎。」
採訪：吳耀輝、徐錦池
攝影：陳辰、梁繼光
