寫專欄，有時同藝人冇乜分別，冇人提驚冇Noise，有人提又唔慌好嘢，網民懷疑Samantha係陳承龍，原因係我哋同日貼了同一隻股，均以舞王城城為軸，仲用埋佢首飲歌做題，俾網民逮個正着──仲唔畀我捉到你？腦海浮現出網民怒吼的畫面「你當我傻㗎？」出入職場靠塗脂抹粉騙了不少人，沒想到一支筆令網民看穿Samantha有幾「仔」，仲話「I'm also sure that it's a man.」。姑勿論文法有冇錯，足見網民幾咁氣憤。網民有如此思路，其實正常不過，在股市打滾，冇福爾摩斯的思維點搵股炒，如何分辦真沽貨、假震倉，有時我都想同個莊講：你當我傻㗎？昨日本報爆皇朝傢俬（1198）大鑊，幸好股民心水清，知道敏華控股（1999）交到數，國慶黃金周期間，開單銷售額按年增23.3%，股價由9月中推介起計，到家升咗34%，出乎意料地升得急，跑贏埋道指同美國樓市升幅，宜待回吐再上車。最後發澄清公告，Samantha乃是女人！Samantha本欄逢周一、三、五刊出