被人撬牆腳，真係好難受㗎。新民黨主席葉劉淑儀，就好有切膚之痛嘞。事關佢嘅愛將陳岳鵬，早年做做吓區議員，突然被曾班子招攬做特首辦特別助理，一去冇回頭。最近又有傳，佢嘅新寵、曾經選過區議會嘅施俊輝，亦有機會被梁班子羅致做政治助理喎。兩度被搶心頭愛，葉劉似乎有氣難消，噚日喺政制事務委員會上，無啦啦話檢討區議員薪酬係日後討論重點，繼而話因為區議員人工低，搞到佢個新民黨好似「藝員訓練班」，培訓完啲政治人才，就被政府以高薪挖角，暗示自己無法留住意中人，都係錢作怪。有建制派中人聽完一臉不屑，話葉劉似乎喺度晒命多啲囉。