老父一句戲言：「你試吓將部錢七放上網睇吓有冇有心人收留佢？」叫兒子楊劭業百般滋味在心頭。雖然玩車超過廿年，但惟獨擁有58年車齡的平治180一直伴隨他成長、結婚等，就算家巡舖都揸佢。 記者：李鑒泉 攝影：劉永發
古董平治保值強
平治180自1953年推出以來共分有多個版本，前期款採用較窄身的水箱設計，後期款則改用較闊設計，並延續至編號W110後繼車款之中。現時很多平治180輾轉到達中東、非洲地區繼續服役，因此二手盤源有限，在英國的carandclassic.co.uk網站有57年生產的平治180放售，內櫳及底盤狀況存疑也叫價約二萬鎊，香港二手盤要賣40萬元一啲都唔奇，照睇楊生隨口叫的58萬亦算合理，古董平治真係老得可愛。
車價一年加一萬
「父親自40年代已經玩車，座駕囊括甲蟲、Morris及Austin等，不過保留得最耐的還是平治180，至今已58年歷史，見證我們幾兄弟的成長，結婚時更用它來做花車！」能於50年代拿出$18,000買新車的絕非泛泛之輩，楊劭業之父楊展熙是檀島咖啡茶餐廳的創辦人，幾兄弟食蛋撻食到大，「細個上車食蛋撻食到周圍都係，結果俾父親鬧到狗血淋頭。」儘管小時候已經駕駛父親的私家車，但直到赴英留學時他才考獲車牌，回流後繼續玩車，父子玩車逾50部，不過楊劭業仍然最愛平治180，至今平均每星期開車為它舒展筋骨，天氣好時更會揸去巡舖，早幾年曾跟車隊一起駕車上桂林。楊父直至近年年紀漸大才將愛車交予兒子，「佢仲成日問我部車近況，間唔中都載佢兜風。」不過，愛車如命的楊父竟然建議楊劭業上網賣車，讓他不明所以，但父命難違惟有一試。然而更難的就是定下車價，「根本無參考價，父親話不如一年加一萬元，結果車價定為58萬元，畢竟都唔急賣，只係睇吓有無有心人收留佢。」咁高價錢都係唔想賣啫，其實他又怎願意割愛出讓自己回憶。
低扭甚強 上斜依舊有心有力
即使年過半百，但從眼前這台平治180（代號W120）彷彿看不出歲月痕迹，「廿年前父親曾經將全車送回原廠作內外翻新，車身顏色亦從原來的黑色更改為金屬色。」此外，這台平治180更於30年前安裝冷氣，因而要將汽車電池從6伏特加至12伏特，引擎也需增設風扇幫助散熱。至於汽車其餘部份，大致保留原汁原味，如早期車款獨有的窄身散熱罩、電鍍泵把、輪殼及側鏡等。作為E-Class鼻祖，180除了是平治首台三箱式設計的房車外，它更採用名為Ponton的車身支撐技術，讓車廂空間較上一款大為提高。以當時標準而言，180車廂已算豪華，如桃木中控、時鐘及象牙式軚環，前後兩張可調校角度的皮梳化更能舒服地坐滿六人，尾箱更是大得驚人。平治180屬當時率先採用Cam帶的新車之一，其1.7公升直四引擎能輸出52匹馬力，低轉扭力甚強，拍攝當日上落大坑一帶斜路未見吃力，楊劭業指車速可達80km/h。「呢部車無風油軚、無動力輔助，加上重極力子同埋四速軚波，其實都揸得幾辛苦。」楊家其實還有一台W116 280S及W116 350 SEL古董平治，至今仍行得走得，是否特別鍾意儲平治？「唔係，係平治特別容易收藏，父親也試過收藏其他牌子，結果都係好易壞，想儲也儲不到。」
規格：Mercedes Benz 180
引擎：1,767cc直四
馬力：52hp/4,000rpm
傳動：四前速棍波
