【本報訊】我們肩並肩，冒着風雨流着汗，今天走到反洗腦運動的十字路口，這是小終結，也是新開始。熱血赤子、勇敢師奶、為口奔馳的香港人、廣場上的你和我，都是全民覺醒運動的主角，都是栽種未來的種子。學民思潮召集人黃之鋒呼籲參與運動的近30萬人次今天重返政總，要求失職教育局局長吳克儉下台，迫使政府清除教科書的洗腦餘毒，「一日仲有一黨專政，呢場運動永無休止，人數就係最大武器。」記者：白琳 倪清江 彭美芳
錯在吳克儉 梁紀昌籲即落台
目前只有大角嘴鮮魚行學校堅持本學年起推行國民教育科，代價是小一自行派位報名銳減四成。素來不畀面政府的校長梁紀昌，直指國教怒潮一發不可收拾，錯在「兩唔一低」的教育局局長吳克儉：唔識應對、唔識教育、政治手法低劣，認為他應學前保安局局長葉劉淑儀，為推銷《基本法》第23條引起的民憤，問責下台。
從不後悔開科
梁紀昌02年出任鮮魚行校長前，曾在前教育署任職21年。將於三年後退休的他不後悔開科，「係讀書人嘅氣節，成個暑假只係收到一個家長電郵問點解開科」。他總結整場風波，在於吳克儉一而再、再而三出錯。「紅色」《中國模式─國情專題教學手冊》在7月被揭發後，梁紀昌指吳克儉未有即時與手冊劃清界線，是第一錯，「呢個局長唔識教育，只係做開人力資源，下面應係有人傳紙仔教佢點答，但佢應變能力比較差，答唔到問題……佢應該話，呢本手冊雖然係教育局資助，但出街前我哋（局方）冇審批過，呢個可能疏忽咗，所以即時收回，咁就可以釋除疑慮。第一次冇講呢樣嘢，以後講乜就冇人信」。第二錯是吳克儉未能指出圖書閱讀和生命教育科也獨立成科，梁紀昌說：「獨立成科係有先例，但局長唔熟悉教育，完全答唔到。」7月底吳克儉與國教家長關注組召集人陳惜姿等人首次會晤，家長拍枱提早離場，梁指這第三錯，令一切無轉彎餘地。「局長政治手法好低劣，陳惜姿出到嚟好嬲，談判最緊要係唔好拉倒……我話大鑊啦，實官逼民反。傾唔掂，家長一定訴諸群眾上街，之後越搞越大鑊。」
家長報名觀課
梁紀昌認為，教育局局長首選，應是原香港教育學院校長張炳良，另一人選是教院署理校長鄭燕祥，兩人也熟悉教育，偏偏卻找來吳克儉，弄出大頭佛，「搞到社會咁大件事，佢要問責。葉劉淑儀推23條，最後佢要落台。如果唔係點叫問責制？我知道寫咗後，實會多咗牙齒印，坦白講，我講嘢冇保留。」鮮魚行學生本周五上首堂德育及國民教育課，都是德育內容；每學期有兩堂國教內容，均放在最後。他強調沒有洗腦，「冇升國旗要學生感動流淚」。有20多名家長報名觀課。
高牆仍矗立 黃之鋒未收得工
一個盛夏，學民思潮帶領全民投身反洗腦運動，中學生重重擊倒高牆。召集人黃之鋒說，今次是反23條以來第二次全民覺醒運動，滲透社會每個角落：監獄裏不能上網的囚犯、路邊裝修工人、海洋公園扮鬼職員也為學民打氣。但是大家不能單靠一班中學生來守護香港，港人必須藉此建立公民社會，慎防國民教育科「分拆上市」。
香港人要有危機感
過去數月，黃之鋒不斷回望03年反23條的歷史，感到與反洗腦運動很相似，「03年靠律師，今次靠學生」。他同時憂慮這場運動同樣像九年前般無以為繼，「大家理所當然覺得，遊行可以推冧政策，但就錯失機會去實踐公民社會」。他回想，當年中央察覺人心未回歸，遂利用公安條例、人大釋法及警權干擾法治，等同把23條分拆上市，當時社會未能察覺，「國民教育科都係咁樣搞出來，中央會唔會又改變方針，再出勁招？」剛滿16歲的之鋒強調，反洗腦運動能否持續，取決於港人的公民意識，「香港人要有危機感，撤科唔代表收得工，呢個政府實同你癲落去，嚟鑊新嘢」。今次運動令家長與學生打破故有思維，主動影響教育政策，但遍地開花的關注組未來應如何運作、是否局限於國教科，仍有待社會討論。開學兩個月，之鋒尚未平衡學業與社運壓力，「Form 1（學生）搵我合照，問陳惜姿係咪我阿媽。搭車有人睥住，十幾條友圍埋影相。冇計，唔通戴面具出街？」放學後馬拉松式開會，記者瘋狂追訪，「冇咗自己，成個人抽空晒，淨番學民思潮四隻字」。周日閒逛黃金商場的「毒男時光」不再，與同學「碌齡」看戲更是奢侈，「中秋同學玩燈籠，我話去梁振英大宅玩，大家dead air；約好食放題，我太攰返屋企瞓覺」。
一邊吃消夜一邊喊
從前一家經常落翠華消夜，現在只能留在家吃，媽媽做水吧冲奶茶。有一晚，四個月積累的壓力終於爆發，之鋒一邊吃消夜，一邊哭了出來，爸媽摸摸他的頭，沒說甚麼。他深知反洗腦運動不會終結，但仍想稍事休息，「溫番書、做番功課已經好好。11月底考mid-term，成績一定跌。我仲要考DSE，屋企人唔係望子成龍mode，但係唔想辜負佢哋」。他期望人群中有更多黃之鋒一起抗爭，「我有能力做到咪做囉，但我哋唔係代議士，唔係like我一下就得。個個願意企出來，就唔需要一個人承擔晒所有嘢」。