大學校長除咗要有出色學術地位，今時今日仲要講究吸金能力，事關募款多寡直接影響大學財政。噚日富翁余彭年各捐400萬元畀港大、中大、科大同理大做獎學金，中大校長沈祖堯、理大校長唐偉章、港大副校長周肇平同科大副校長翁以登都畀面出席頒獎禮，親手接過張大支票。最近理大同嶺大爆發醜聞，俾傳媒同學生鬧爆，嶺大校長陳玉樹以健康為由辭職。中大校長沈祖堯喺頒獎禮前同嶺大劃清界線，話唔係間間大學自資學位都有問題，中大唔係為收學生而開學位。其實嶺大連同教院同港大，今年香港有三間大學要請校長，沈祖堯都好感嘆同八方講校長嘅工作好複雜，每個校長面對問題都唔同，佢仲笑笑口咁講，少答傳媒問題會少啲壓力喎。