梁振英今日落立法會介紹施政理念及交代重組大計，對於佢嘅理念，無論講到幾天花龍鳳，都唔會得分，因為佢誠信問題仍未交代，把口越叻市民越大懷疑。至於交代重組，估計會將獨立成局的文化及資訊科技重新上馬，相信會引發立會一場大戰。據悉最近內地密使紛紛來港收風，詢問對梁振英施政睇法，而本地各單位也要就此寫報告送呈中央參考。大家不約而同歸納出三大缺點，包括對政府運作不了解、冇管治經驗及冇政治能量。前兩項大家都知，他放在特區建制培育多年，一直錫身，從未真正孭起一瓣而搞出成績，只係做塘邊鶴搭訕。但最令中央跌眼鏡係第三點，欠缺政治能量，即係話佢政治上冇朋友，冇人冇物，大小施政出台，除了幾件鐵桿梁粉外，冇人會出力撐佢。政府內部林鄭又搶韁，乜嘢都插手，政務官怨聲載道。至於建制派，佢比曾蔭權好不了多少，佢一條友吹雞，建制派冇人會聽，一定要靠西環幫手。人大政協系統嘅支持，真係又唔多覺。人大代表范太在適當時候出來抽水，打踭插眼，係代表一部份親中勢力。昨日下午攞份親中《新晚報》，一睇頭版有個廣告，宣傳該報下周一推出「質問梁振英專版」，內文狂插振英，差啲以為自己睇緊《爽報》。唔信，一齊睇睇：
《新晚報》也狂插狼英
「香港回歸15年餘，民怨有增無減，尤其是梁振英上台後，其民望更跌落新低，然而在多個場合被質疑何以無所作為時，他卻不厭其煩地將責任歸咎上屆政府，並且以棋局作解脫，這都不禁讓人感到他的處事方式完全沒有承擔，而且醜聞不斷，再如此下去，香港將會變成一個怎麼樣的社會？實在難以想像。」添馬男