「洗腦」國民教育要求學生，升國旗時要感動流淚，咁高層次嘅愛國情懷，八方覺得要入演藝學院培養幾年先可以做到。可能有見及此，愛國、愛黨、愛香港嘅鄉議局，噚日開執委會就通過，向政府爭取「專款專項」撥款，喺新界每條鄉都安裝旗杆，用嚟掛國旗同區旗，希望提高村民嘅國民意識喎，發叔就話撐條條鄉都升旗喇。八方唔知有幾多村民，會因為村口多咗支國旗而「感動流淚」；但鄉議局唔係只此一路撐洗腦，事關佢哋仲有個國民教育委員會，不時搞吓平價交流團畀成員親親祖國，好似嚟緊11月24、25號就有深圳、東莞兩天團，包食包住都係580蚊咋。