【本報訊】恒基地產（012）兼中華煤氣（003）主席「四叔」李兆基昨以「主人家」身份出席煤氣150周年酒會時，不忘為樓市「把把脈」。他直言樓價高企的「元凶」為供應量不足，雖然未來供應會「拾級而上」，惟在建築成本「飛升」抵銷下，未來樓價亦難向下回落，料今後兩至三年樓價「頂盡」升一至兩成。 記者：吳永強
四叔表示，現時樓價「貴」，全因過去幾年供應不足，造成「僧多粥少」局面，雖然政府近期已推出「港人港地」及「梁十招」等政策，企圖為「火辣」樓市降溫，惟四叔明言「遠水不能救近火」，短期樓價仍會高踞不下。
作為四大地產商之一的四叔亦有為後市「把脈」，並為未來兩至三年樓市留下兩個註腳，分別是「難跌」及「微升」。他認為，未來樓價在供應漸增的情況下，升幅將會紓緩，近兩三個月投地地價已向低走，「過去幾年每年起嗰啲樓就係一萬個，但係今後嗰幾年，出年就可能有兩萬個，再出年呢就有三萬個，再多啲就有四萬個都唔定，到時個市場唔會學得家咁短缺，家因為短缺，個價錢先咁高，將來個價一定無咁好！」
雖然樓盤供應增加，但四叔亦認為，樓價在未來兩至三年難見回落，全因建築費「越升越有」，他以屯門區為例，指十多年前其建築成本每呎僅約600元，但現時已升至每呎至少約3000元，升幅高達五倍。「將來嘅建築費都唔跌得，因為建築費貴，所以佢嘅樓價都一定要貴番！所以我認為兩、三年後啲樓價都唔會跌，會微微地起……個價就升10至20%咁上下。」
供應漸增 升幅趨放緩
對於本地樓市持續出現「供不應求」情況，四叔不忘將責任「拋」給政府，狠批政府審批發展商建樓的手續繁複，「普通起一個地盤都要四、五年先搞得通」。另外，早前各大地產商「狂抦」政府審批樓花預售同意書時間太長，四叔亦感同身受地指出，「我哋有樓都唔賣得出……個市咪形成咗衰上加衰」。不過，他指最近政府已經變得「聽話」，「最近佢（政府）就快呀，聽話囉，快好多囉，家呯呯嘭嘭，有四、五個大盤出啦！暫時計個樓價會好平穩。」
四叔預期「㷫烚烚」的樓價將會稍微「冷卻」，市場人士亦表認同，紛紛認為樓市升幅將會放緩。戴德梁行香港董事總經理冀北亞區策略發展顧問部主管陶汝鴻預期，本港住宅樓價會繼續上升，由目前至年底，升幅約5%，相比起今年首9個月，升幅會放緩，惟明年首兩季預計樓價仍有5%至8%升幅。
推盤量將大增六成
美聯物業首席分析師劉嘉輝則認為，由於政府加快審批預售樓花同意書，9月份獲批單位數目創近八年新高。他預期，未來9個月推盤量將增加近六成至1.4萬伙，故樓價升幅因此放緩，惟料仍有雙位數字升幅。
四叔金句
”以往每年有一萬個（新住宅供應），照我估計，出年會有兩萬個，再出年可能有三萬個，可能有四萬個都唔定……但啲價又唔跌得喎，因為建築費貴。”
”香港啲地產股平得好緊要，如果每股係值100蚊，但家個市成交咁差，啲人都唔識計數嘅，竟然畀得40蚊你。”
”最好批准賣樓快快趣趣，最近佢（政府）就快呀，聽話囉，快好多囉，家呯呯嘭嘭，有四、五個大盤出啦！”
網民洗版
四叔話未來三年樓價難跌
Dominic Tsang
梗係啦！未出晒貨，使橫手托住先啦！
Raphael Tsang
未來三年香港年青仝人齊瞓街。
Gigi Weng
主觀願望，每人都有，做地產商人怎會望樓價跌呢？
Louis Chan
六月份當長實賣緊峻瀅時，你大大聲話未來「貨多市不爽」，係你自己講，我一早睇到你嘅用意是想保留啲準買家畀你，家你賣尚悅，就改晒口風話升……
Wai Hung Chan
一於罷買。
資料來源：《蘋果日報》留言區