啲人成日話無綫小器，馮仁昭最近發覺唔成立。前排電訊魔童王維基嘅CTI免費電視台向無綫台前幕後大挖角，搞到無綫使咗大筆錢留人，唔嬲就假，不過前晚查小欣揸旗嘅無綫節目《爆足一周》，竟然訪問幫CTI拍劇集《童話戀曲201314》而同廖碧兒傳緋聞嘅蘇永康，當日仲以為係CTI劇集宣傳，講真，馮仁昭以為呢part係CTI喺無綫嘅植入式廣告㖭，原來無綫都幾大方。
觀眾鬧爆
其實康仔同廖小姐呢單緋聞係周刊喺10月3號爆出嚟，小欣姐個節目究竟叫爆足一周定遲足一周先？講番啲舊聞都搵康仔親自上嚟，睇得出好有誠意，不過做完訪問，小欣姐就同班主持圍埋數康仔嘅說話有乜嘢疑點，最好笑係呢個話點解康仔要頻頻飲水，嗰個又話佢呢個動作係自我保護嘅表現，個個讀心神探上身咁解構康仔精神同心理狀態。
《爆足一周》繼續翻炒舊料，第二集收視保持住平均17點收視，但噚日收到九個電話同三個電郵投訴，啲觀眾勁鬧節目內容沉悶，只係齋噏，話明爆足一周，梗係聽你爆料，而唔係睇你齋噏一周喇！