上星期聯想（992）超前惠普（HP），以0.2個百分點市佔率之差，成為世界最大嘅個人電腦生產商，是少有喺國際市場成功嘅中國企業。中國貴為全球第二大經濟體系，早前Interbrand公佈100大最有價值品牌，就居然無一個強國品牌上榜，連韓國都有Samsung（第9），香港叫沾了半間HSBC（第33）的光，但中國無！海迪覺得都幾悲哀。
早在2008京奧之前，好多企業家話要建立中國品牌，但時至今日，中國入世都逾十年，我哋有咩進展？內地汽車有60%是外國牌子，衫就被Zara、 Uniqlo、 H&M打殘，咩李寧（2331）、利郎（1234），條數好幾年就走樣。似乎中國人搵快錢好叻，但持續經營同提升質素方面，仲要摸索下。
高盛早前估計，未來廿年最有機會打入全球20大，會係百麗（1880）、周大福（1929）和高鑫（6808），海迪唔質疑佢哋仲有增長，但睇佢哋現時嘅經營模式，唔覺得有能力可以喺國際舞台紮根。等一隻made in China嘅國際品牌出現，唔知等到幾時。
海迪