未嫁嘅女士叫做「剩女」，喺街市賣唔去嘅餸菜就叫做「剩菜」。由方敏生揸莊嘅香港社會服務聯會，噚日請咗10位議員食「賣剩菜」，等議員體驗吓低下階層食剩菜嘅滋味，社聯義工用剩菜煮咗四餸一湯，等議員邊食邊談貧窮，希望佢哋未來要關注貧窮問題。
公民黨毛孟靜就好欣賞碟炒茄子，話如果佢煮，一定煮到啲茄子變成黑色，大讚「剩菜」好食，粥都添咗三碗，仲同佢同枱嘅基層媽媽講，要下一代脫貧，最重要係學好英文，食飯不忘本行，真厲害。
民主黨胡志偉就話，唔少街坊為咗慳家，會等到街市收檔先買餸，餸錢慳足三分之一，味道一樣咁好食。呢個收集剩菜轉基層嘅「好惜食」計劃，由香港婦女中心協會搞咗年幾，現時只局限喺深水埗。方敏生話，下次計劃請「大孖沙」食，等佢哋捐多啲錢。
