早前反國教運動如火如荼之際，學術界悄悄紅咗一位撐國教打手，佢就係港大教育學院副教授李輝。呢位李博士，曾經喺報章撰文，話學民思潮嘅反國教理據至少有四種邏輯錯誤，因此成名。李博士搞完學民思潮，最近轉攻同業，日前喺facebook撰文鬧鬍鬚講師蔡子強係「偽學者、真呃人」，唔知係咪因為蔡子反國教太得力，令李輝唔多順超？李輝質疑蔡子係senior instructor（高級導師）啫，做乜以senior lecturer（高級講師）自居？大鬧佢誠信有問題，冇資格批評狼振英冇誠信喎。
被質疑有政治目的
據聞呢段文章喺學術界瘋傳，李輝何解為小事大動干戈？大家最唔明嘅係，一直名不經傳嘅佢，早前突然撰文硬撐洗腦教育；而蔡子就係堅定反國教派，有多心人質疑：哦，唔通李輝發炮係有政治目的？八方為免被李輝話有邏輯錯誤，主動打去求證。李輝堅持話中大網頁話蔡子係instructor；對於被封撐國教大旗手，佢非常高興咁笑住話： 「我何德何能有咁高榮譽呀？」事實係，蔡子原來喺8月1日升呢做lecturer，中大政治與行政學系網頁可以佐證。李輝只要勤啲上網求證，就可以避免鬧錯人。有學術界人士話李輝嘅指控非常嚴重，係咪要向當事人道歉先？無啦啦「中伏」嘅蔡子反而一笑置之，只呼籲對方做好求證工作。mailto:[email protected]