家陣養大小朋友，點只養兒一百歲，長憂九十九，更怕佢買唔起樓。上水威尼斯花園，最近有單243萬元嘅成交。買家講明買嚟等個仔將來結婚用。
呢位家長雖然略嫌「廿四孝」，不過佢有呢個決定，一啲都唔奇。只要有少少經濟常識都知，香港土地供應少，目前息率低到冇朋友，美國印鈔機全速開動，火上加油下，買磚頭成為保本良方，買樓幫個仔做定投資，絕對Make Sense。
張炳良早前話樓市奇怪，菲菲認為奇就奇在CY經常強調要遏樓價升勢，更隆重推出「梁十招」，但十招一早食晒蕉，樓價仲反升一成。
目前80後、90後，你叫佢哋「打工、儲錢、買樓」，佢哋會回你一句「發夢就得」。呢位家長一方面怕個仔儲唔到首期，更怕到佢大個仔時樓價分分鐘升到買唔起嘅水平，索性趁自己有能力，就幫個仔上車先。
所以話「早買早享受，遲買貴幾球」，連四叔都預言樓市未來3年不跌。睇怕陸續有家長除咗幫仔女儲教育基金外，仲要儲埋買樓基金。
Fifi
本欄逢周二、四刊出